مدونه

الابطال :
المذيعه : امرأه في الخمسين ترتدي ملابس فتاه في العشرين ومن كثره عمليات شد وجهها يبدو معوجا علي الناحيه اليمني انفها ايضا صغيرا زياده عن اللزوم مما يجعلها تلهث معظم الوقت لانها لا تستطيع التنفس ترتدي الكوفيه الفلسطينيه
الراوي : غالبا انا ولا ارتدي الكوفيه الفلسطينيه
شاب متحمس 1 : طويل متين البنيه ذو شارب اسود منسق يرتدي ستره والكوفيه الفلسطينيه
شابه متحمسه 1 : بيضاء البشره جميله محجبه تمسك علم فلسطين وترتدي الكوفيه الفلسطينيه
شاب متحمس 2 : اسمر البشره ممتلئ القوام يرتدي نفس الكوفيه
الكومبارس : شباب وفتيات متحمسات يرتدين الكوفيات الفلسطينيه

المشهد الاول : مظاهره ضخمه في حرم احدي الجاماعات العريقه
المذيعه : وواااا في وسط هذا ال حشد ال جماهيري ال فزيع والذي يؤكد علي ان قضيه فلستين لن تموت ابدا نلتكي مع احد الشباب واللي كان من شويه مكسر الدنيا هتافات
المذيعه تلتفت للشاب المتحمس 1 : نتعرف عليك
الشاب في خوف : مش مهم الاسامي المهم العمل احنا بنطالب الشباب كلهم في كل الوطن العربي من المحيط الي الخليج بكل فئاته الشعبيه والحكوميه انهم يتحركوا يقوموا لمناصره المسجد الاقصي لازم نعمل حاجه يا جماعه عشان اسرائيل بدأت فعلا في هدم المسجد
الراوي : طب وانت ممكن تعمل ايه ؟
الشاب يتجاهل الراوي : لازم الشباب يقاوم ويقاطع المنتجات الامريكيه والاسرائيليه لازم نعمل حاجه عشان نوقف المذابح اللي بتحصل في غزه وفلسطين
الراوي : ايوه يعني انت مش معانا في الليله دي يا حج ولا ايه ؟
المذيعه تتجاهل الراوي : برافوا عليك انا باحيي مجهودك الرائع في المظاهره ( للكاميرا ) وياريت كلنا نحذو حذو هذا الشاب المتحمس الجميل ( هامسه للشاب ؟) موبايلك كام بقي ؟
الكاميرا تبتعد عن الشاب
الراوي للشاب : طيب يابني ايه اللي انت ممكن كشاب تعمله عشان القضيه الفلسطينيه ونصره المسجد الاقصي
الشاب يخرج علبه سجائر مستورده وينفخ في وجهه الراوي : وانا في ايدي ايه اعمله اكتر من كده . هو كل حاجه عليا لوحدي ولا ايه ؟ هو انا يعني هاقطع نفسي ؟ مانا شغال م الصبح فحت وردم اهو وهتافات وجعير والشباب شايلني من عشره الصبح لحد دلوقتي ( الساعه 3 الضهر ) لما ورمت .. روحي روحي الله يسهلك يا حجه
المذيعه للشابه المتحمسه : وانتي تقولي ايه في المناسبه دي ؟
الشابه المتحمسه : يا جماعه لازم ناخد خطوات عمليه لمناصره الاقصي حرام والله يضيع الاقصي في حياتنا لازم نعمل جروبات علي الفيس بوك ندعو كل الشباب في العالم العربي لمناصره الاقصي ونعمل ايفنتات للمظاهرات لازم نقول لا .. لا لهدم المسجد الاقصي . لا للمذابح الاسرائيليه ,, لا لاغلاق الانفاق بينا وبين غزه .. انا بادعو كل شاب حر وطني مسلم غيور علي دينه انه ينضم لي علي جروب الموت لاسرائيل علي الفيس بوك وجروب جيش محمد وجروب من اجل اقصي حر وجروب لن ننساك يا اقصي
الراوي : والجروبات دي هي اللي هاتحرر الاقصي يا ست ابوها ؟
الشابه تتجاهل الراوي : عايزين نجمع مليار توقيع ضد هدم المسجد الاقصي
الراوي : وان شاءالله المليار توقيع دول هاتعملي بيهم ايه ؟
المذيعه تتجاهل الراوي : كويس جدا ان فيه شباب متحمس للقضيه والاجمل ان الامن الوطني مشارك في هذه المسيرات زي ما حنا شايفين كده
الكاميرا تدور لنشاهد قوات الامن المركزي تطوق الشباب واساتذه الجامعه داخل جزء من حرم الجامعه بينما باقي الحوش يقف فيه شباب يصورون المظاهره
المذيعه للشاب المتحمس 2 : وانت جاي تعمل ايه النهارده عشان المسجد الاقصي
الشاب 2 يرفع الصوره الشهيره جدا لمسجد قبه الصخره التي تحرص كل الدول علي نشرها علي انها صوره المسجد الاقصي حتي لا نعرف الصوره الحقيقيه له : انا بارفع صوره المسجد الاقصي عاليا وكتبت قصيده عصماء فظيعه والله العظيم كنت بابكي وانا باكتبها وهاقولها في كل مكان وهانشرها في النوتس بتاعتي ع الفيس بوك وف كل المنتديات وهاوصل صوتي بيها لكل مكان وكمان انا الكريتور والادمن بتاع جروب عايزين مليار توقيع عشان ننصر الاقصي الجريح
المذيعه : براوف بجد انا هانضم للجروبات دي كلها اول لما افتح النت بالليل ( هامسه له ) ايميلك ايه بقي ؟
الكاميرا تعمل زوم اوت لنري المظاهره مره اخري وكان الجميع صامتون حتي تنتهي المذيعه من التسجيل وعندما اشارات لهم رددوا هتافات تقول : بالروح بالدم نفديك يا اقصي

الراوي للشاب المتحمس 2 بعيدا عن الكاميرات : طيب ما بدل ما تضيع وقتك يابني ع الفيس بوك تجمع مليار توقيع ما تجمع اكل وبطاطين للناس دي او حتي اجمع قوات تروح تحرر الاقصي بجد
الشاب 2: معلش والله يا طنط اصلي عندي عذر مش هاعرف احارب اليومين دول
الراوي يقف امام الكاميرا بالعافيه وغلاسه كده : اسمعوا بقي لازم نواجهه نفسنا احنا ولا هانحل ولا هانربط يبقي الكلام ده كلام فارغ ومعمول عشان الاعلام والفرقعه وخلاص لازم نعترف اننا ضعفاء ومافيش في ايدينا حاجه خالص يبقي اضعف الايمان اننا نصوم يومين في الاسبوع الجاي ونصلي صلاه الحاجه لوجه الله تعالي .. كل الشعوب العربيه يمكن يكون فيه حد فينا كويس عند ربنا ويستجيب له ويبعت لنا حد يساعد الاقصي
الامن المركزي يقبض علي الراوي وينزل فيه ضرب لحد ما يبان له اصحاب